Kolumbiyalı məşhur müğənni Şakira öz vətəninin ən çox zərər görmüş bölgələrindən biri olan Çoko departamentinin Kibdo şəhərinə səfər edərək dağılan məktəblərə baxış keçirib və yerli şagirdlərlə görüşüb.
Səfər zamanı o, həmçinin Çoko Texnologiya Universitetinin bərpasına sərmayə qoymaq niyyətində olduğunu bildirib. Layihə üçün vəsait Şakiranın Pies Descalzos fondu tərəfindən ayrılacaq.
Məlumatda qeyd olunur ki, həmin yardım kampaniyasında amerikalı xeyriyyəçi Hovard Baffet də iştirak edəcək və birlikdə zərərçəkənlərə dəstək göstərəcəklər.
Avqustun 10-da baş verən yeraltı təkanlar nəticəsində 289 nəfər həlak olub, 4 187 nəfər yaralanıb, 142 şəxs itkin sayılır. Təbii fəlakət zamanı 26 945 ev tamamilə dağılıb, 127 557 evə isə ziyan dəyib.
Kolumbiyaya yardım məqsədilə ABŞ, Ekvador və İsraildən 138 nəfərdən ibarət xarici xilasedici qüvvələr gəlib. Zəlzələ 7,4 maqnitudada qeydə alınmış və San-Xose-del-Palmar şəhəri yaxınlığında baş vermişdi.
