Son illərdə paket çaylardan istifadə genişlənib və bu, məhsulun sürətli hazırlanması ilə yanaşı, onun təhlükəsizliyi barədə suallar da doğurub. Xüsusilə paket materiallarının isti su ilə təması zamanı hansı maddələri buraxa biləcəyi diqqət mərkəzindədir.
Bir sıra araşdırmalar plastik tərkibli çay paketlərinin dəmlənmə zamanı mikroplastik və nanoplastik hissəciklər ayırdığını göstərib. Lakin elmi cəhətdən bu hissəciklərin aşkar olunması onların insan sağlamığı üçün mütləq zərərli olduğunu sübut etmir; uzunmüddətli təsirləri və insan orqanizminə daxil olma yolları barədə kifayət qədər məlumat yoxdur.
Qida eksperti Ağa Salamov paket çayların müxtəlif materiallardan hazırlandığını vurğulayır. O bildirir ki, bəzi paketlər sellüloz lifləri və abaka kimi bitki mənşəli xammallardan istehsal olunur və bu cür materiallar insan sağlamlığı üçün təhlükəsiz hesab edilir.
Ekspert əlavə edib ki, qida ilə təmas edən materiallardan bəzi maddələrin suya və ya çaya miqrasiya edə bilməsi ehtimalı var. Bu səbəbdən materialların təhlükəsizliyini qiymətləndirərkən miqrasiya səviyyəsinin və mümkün toksikoloji risklərin müəyyən edilməsi əsas rol oynayır.
Ağa Salamov həmçinin qeyd edib ki, çayın xırda və ya toz halında olması onun keyfiyyətsiz olduğunu göstərmir. Paketin üzərindəki məlumatlar və istehsalçı barədə məlumatlar məhsulun keyfiyyətini müəyyən etməkdə ilk növbədə nəzərə alınmalıdır. Bəzi istehsal texnologiyalarına əsasən paketlərin içinə iri, dənəvər yarpaqlar qoyulur; istehlakçılar bu variantlara üstünlük verə bilər.
Son olaraq ekspert məchul istehsalçıya aid və ya kifayət qədər məlumatı olmayan toz halındakı çayların alınmasından çəkinməyi tövsiyə edib, çünki belə hallarda qatqıların olması ehtimalı arta bilər. Məhsulların təhlükəsizliyi və mikro/nanoplastiklərin insan sağlamığına uzunmüddətli təsirlərinin tam qiymətləndirilməsi üçün əlavə elmi tədqiqatlar tələb olunur.
