Ukraynanın sabiq müdafiə naziri Mixail Fyodorov Britaniyanın BBC kanalına müsahibəsində prezident Volodimir Zelenskidən yaxın çevrəsində mümkün korrupsiya hallarına münasibət bildirməsini tələb edib.
Fyodorov əlavə edib ki, dövlət başçısının bu məsələ ilə bağlı açıqlama verməsi onun məsuliyyətidir və hamının bilməsi vacibdir ki, prezident bu hadisələrdən xəbərdar olub-olmayıb. Keçmiş nazir həmçinin qeyd edib ki, onun Zelenskinin şəxsi şəkildə korrupsiyada iştirakını təsdiqləyən hər hansı sübutu yoxdur.
“Qoy bu suala cavab versin. Düşünürəm ki, o, belə suallara cavab verməyə hazırdır. Mən heç bir fərziyyə irəli sürmək istəmirəm”, — Fyodorov deyib.
Keçmiş nazirin şərhi Ukraynanın korrupsiyaya qarşı mübarizə qurumlarının ötən həftə açıqladığı istintaqa münasibət zamanı səslənib. İstintaq materiallarında bildirilir ki, çirkli pulların yuyulmasında ittiham olunan sabiq energetika nazirinin girov müqabilində sərbəst buraxılması üçün nəzərdə tutulan 3 milyon dollardan artıq vəsaitin mənimsənilməsi sxemi müəyyən edilib.
Araşdırmada iddia olunur ki, bu sxemdə prezidentin ofisinin yüksək səviyyəli əməkdaşı iştirak edib; həmin şəxs daha sonra vəzifəsindən azad edilib.
Ukrayna prezidentinin nümayəndəsi isə Fyodorovun 2019-cu ildən etibarən müxtəlif hökumət tərkiblərində yer aldığını xatırladıb və onun hazırkı hakimiyyət barədə sanki heç bir əlaqəsi yoxmuş kimi danışmasını anlaşılmaz saydığını bildirib.
