Avqustun 21-də Günəş səthində gücünə görə M sinfinə aid partlayış qeydə alınıb.
Hadisə Bakı vaxtı ilə saat 13:50-də rentgen diapazonunda M1.6 sinfi kimi ölçülüb. Tədqiqatçılar bu hadisəni müşahidə ediblər.
Qeyd edilir ki, avqustun 20-də eyni vaxt çərçivəsində üç M və on altı C sinifli partlayışlar da qeydə alınmışdı. Mütəxəssislər yaxın günlərdə ən yüksək kateqoriya olan X sinfinə aid partlayışların meydana gəlmə ehtimalının olduğunu vurğulayıblar.
Alimlər xatırladırlar ki, Günəşdəki partlayışlar rentgen şüalanmasının gücünə görə A, B, C, M və X kateqoriyalarına bölünür. Ən aşağı səviyyə olan A0.0 sinfi Yer orbitində hər kvadrat metrə 10 nanovatt şüalanma gücünə bərabər sayılır və hər növbəti sinfə keçid zamanı şüalanma səviyyəsi on dəfə artır.
Həmçinin bildirilir ki, bu cür partlayışlar plazma atılmaları ilə müşayiət oluna bilər. Əgər həmin plazma buludları Yerə çatarsa, planetdə maqnit fırtınalarının yaranmasına səbəb ola bilərlər.
